活在拍片道德的時代

每一日，香港公共交通上充斥各種欠缺公德的事情：剪指甲；唔戴耳筒睇動新聞、打機、聽歌；開大喇叭不斷聽Whatsapp的語音訊息；成個人挨住條柱做柱男柱女；明明好迫仲要死迫入嚟；明明中間好多位但因為你想易啲落車係要企喺要道阻住晒；衝門，見到有空位好似精子追卵子趕投胎咁衝過來；大聲喧嘩、談話；個小朋友可以著住鞋踩上個位到而家長覺得「小朋友係咁架啦」，或個小朋友在車上玩捉迷藏而家長視若無睹.............

如果只將這些事情，影幅相，拍段片，就是新聞，做新聞真是很容易，而且每日都有好多新聞。我們社會每天都有這麼多缺德的事（又豈止公共交通上），點解近年只係攞讓座來放大，放大到可以有明報記者當新聞咁做，當「新聞」咁公審批鬥。要做，又可否做得有記者專業水平？問題根源呢？點解有啲人會咁做呢？可否做一個深入探討的專題？而唔係「直擊廢青不讓座」這些不是新聞的新聞。

或者，這很符合香港人的口味，公德事情，黑白清晰，容易分辨，讓人有雄霸道德高地的快感，但對於政治道德崩壞、社會體制崩壞、香港禮崩樂壞這類要思考的大是大非，則以「我討厭政治」為由而視而不見。一個一個有如大時代的丁蟹，都愛口頭仁義道德，面對大是大非卻只會考慮自己利益，最後，甚麼都不敢做，龜縮收場。

我數了這麼多香港人缺德事情，係咪代表香港人質素真係好低？我又不覺得，因為我沒有數出我見到讓座的例子，我沒有一一數出大部分正常乘客的舉動，因為正常，何必多此一舉？這之所以我們特別記得不正常的例子，也容易將之無限放大。再多幾十個人將這些不讓座相片、片段放上網，社會就不再出現這些缺德事情嗎？不會的，因為做着以上缺德事情的，很多時也跟教育、背景有關。當一份報紙影住「廢青」不讓座，我見到更多阿叔阿嬸剪指甲、開大喇叭聽粵曲、聽馬......。有些人，是怎樣教養都是缺德的。

對，我們希望社會更有公德，但，這種方法行嗎？

未有手機拍片和網絡的時代，在公眾地方，見到一個人打尖，還惡人先告狀，想出手打人，這時出聲調停制止的，就是英雄。

在有手機拍片和網絡的時代，在公眾地方，見到一個人打尖，還惡人先告狀，想出手打人，舉起手機拍片並放上網的，那個人就是英雄，因為他拍到那個被打尖的人畀人打到豬頭，從而讓全世界公審並起底打人者；分享片段和批鬥的，也成為英雄，因為社會有人畀人打到豬頭，而我們幫他申張正義啊！即使我們在現實看到這個情境時，只會龜縮。

我們就是活於這種廉價英雄的時代吧！