四叔又叫人買樓！

今日四叔又叫人買樓，指「自住可以買，炒就唔好了」，並指樓價最多跌多一成。

買不買樓是個人決定，要考慮的因素很多，對此我沒意見。但我實在覺得，這半年裏還叫你買樓的地產商、地產經紀等，我唔知用好嬲定好笑嚟形容。

第一，這些人都不是醫生、律師那類專業人士，受專業操守規範，換言之他們可以隨便吹水發表意見而不用負責；第二，他們全部都有龐大利益衝突，正如韓非子話，賣棺材嘅都希望每日有人死，地產商和地產經紀唔去到證實跌果刻，點會倒自己米同你唱淡？冇成交仲有生意？

樓價跌咗幾多？一至兩成，係咪好多？唔係，跌一至兩成仍然係天價，仍然係好多人負擔唔起。咁喺呢一刻邊個有能力買樓？十年前入市依家仲賺緊大筆果批，但如果係自住，多數唔會賣；如果有多一層係投資用，賣就係止賺，即係睇淡，賣咗唔會買另一層。呢幾年入市果啲，有可能做緊負資產，或者資產值已縮水一兩成，換大啲就好艱難，又唔多會買。呢幾年都買唔到，跌咗一兩成仍然都係買唔到，冇得買。剩返嘅，就係原本買唔到，跌咗一兩成剛好買到，同埋本來就買到，等跌先買嘅人，呢啲人有幾多？唔太多，但問題係，如果佢哋入市，係咪真係「自住就冇問題」呢？

試想，如果最後呢批仍能夠在高位(跌一兩成根本唔叫咩低位)全部接埋貨，假若樓市再下滑，即係成個市場嘅購買力就揸乾揸淨，咁請問個市場仲有咩能力托住個市？越來越少人接到貨，樓市只會再下滑。如果我係地產商或地產經紀，我都希望依家啲人覺得見底快快入市，消耗最後的購買力，自己袋袋平安，樓市唔再跌，就冇晒憂慮，樓市真係跌，連最後的錢都捲走埋，憂慮嘅就係呢一兩年買樓果班。

地產商不是不斷用盡招數捲盡市場上所有購買力嗎？為甚麼越來越多私樓劏房，越劏越細，越起越垃圾？因為連經濟能力較差的，都能夠死慳死抵上到車，滿足了香港的「核心價值」。到今日，樓市開始下調，都只係調咗半年果一成幾，就急急叫大家入市，希望谷埋最後的購買力。咁樣，地產商就贏到最後！

咁話返轉頭，自住又怕咩下行風險呢？其實如果你係公務員、長工教師等「鐵飯腕」，問題就真係少好多，唯一問題係你高位接貨月供二萬以上，份工變晒質幾屈辱你都要忍忍忍，人生幾無意義幾辛苦捱出健康問題都要頂頂頂，基本上你唔使點擔心供唔到嘅。但其他打工仔呢？

半年前寫過文話今年經濟不看好，事實上這半年經濟係差，連的士佬都話靜咗好多。但你話係咪好差？又唔係，但會唔會差落去呢？我唔知，我剩係知道，有間大型建築師樓減薪15%，今日東亞炒咗180人。「樓價下滑」和「自住冇問題」背後的關鍵假設係「你仍然有能力供樓」，即你的收入即使冇增加，也要不變。大家關心嘅，從來唔係樓市下跌多少，而係經濟有幾差，會否出現大規模裁員和減薪潮。近幾年樓價相當高，即使而家入市都係供死你，則師要減15%，做證券的被裁員，這些都是聽起來十分高收入的專業啊！供樓負擔咁大，裁員減薪就業機會減少失業率上升，一個人撐到幾耐呢？租都話可以租偏遠啲，買的話，變了負資產，賣樓都唔掂。這才是最得人驚的地方。

所以我先話，有鐵飯腕，唔使驚，最多學做奴才。但你份工唔係鐵飯腕，冇雄厚積蓄(唔係資產，經濟下滑資產一樣萎縮)，在一個樓市下滑的階段入市，係要三思再三思。無論上升或下跌的趨勢，都不會一直跌然後停低，中間必然有起伏，求其搵張股票圖看看便會知道。你真肯定，連續跌了半年後的少少升勢，就係反彈？

其實四叔都同你講咗：「炒樓就唔好買啦，風險高。」即係咩？即係樓市冇乜得點升，咁炒家唔入市，即係需求再減一截，咁點解仲會升？

加上咩加息周期果啲，唔使多講，唔重要，最關鍵仍然係大陸。正如半年前所講，經濟最大嘅隱憂係咩？係大陸啊！點解大陸咁大隱憂呀？因為佢爆大鑊都唔會畀你知啊！唔畀沽空又唔畀唱淡，數據又唔知真定假。冇嘅，直至「讓領導人先走」的壯舉完成，你哋咪知囉。

上述都係吹吓水，唔係專業意見(即使呢方面的財演專業意見更冇用)。想買就買，想信四叔就信——但我要提一提你：四叔無端被捧為股神的年代話恒指升上三萬八點，之後自嘲自己唔係咩股神！大概，係燈神！